මැදපෙරදිග කලාපයේ පවතින දරුණු ගැටුම් මධ්‍යයේ, කුවේටයට ඉහළින් පියාසර කරමින් තිබූ F-15 වර්ගයේ ප්‍රහාරක යානයක් බිම හෙළීමට තමන් සමත් වූ බව ඉරානය නිල වශයෙන් ප්‍රකාශ කර සිටියි. යානය ගිනිගනිමින් කඩා වැටෙන ආකාරය දැක්වෙන වීඩියෝ දර්ශන ද ඉරාන බලධාරීන් ප්‍රසිද්ධ කර ඇති අතර, එහි සිටි ගුවන් නියමුවන් දෙදෙනා නිරුපද්‍රිතව යානයෙන් ඉවත් වී ඇති බව වාර්තා වේ. කෙසේ වෙතත්, මෙය ‘මිත්‍ර පාර්ශවීය ප්‍රහාරයක්’ (Friendly Fire) විය හැකි බවට ද තහවුරු නොකළ වාර්තා පළ වුවද, ඇමරිකාව හෝ ඊශ්‍රායලය මේ දක්වා ඒ පිළිබඳව නිල ප්‍රකාශයක් නිකුත් කර නොමැත.
ගැටුම් ආරම්භ වී තෙවන දිනය එළඹෙද්දී ඉරාන උත්තරීතර නායක අයතුල්ලා අලි කමේනි ඝාතනය වීමත් සමඟ කලාපය දැඩි අස්ථාවරත්වයකට පත්ව ඇත. මේ වන විට ඩුබායි, අබුඩාබි සහ දෝහා වැනි ප්‍රධාන නගරවල පිපිරීම් වාර්තා වන අතර, ලොව කාර්යබහුලම ගුවන් තොටුපළක් වන ඩුබායි ජාත්‍යන්තර ගුවන් තොටුපළේ කටයුතු ද තාවකාලිකව අත්හිටුවීමට බලධාරීන් පියවර ගෙන තිබේ. පවතින දරුණු යුදමය තත්ත්වය හේතුවෙන් මේ වන විට සිවිල් වැසියන් බහුතරයක් ඇතුළු පුද්ගල මරණ 200 කට අධික සංඛ්‍යාවක් වාර්තා වී ඇති බව මානව හිමිකම් සංවිධාන පෙන්වා දෙයි.
ඉරානයේ මිනාබ් නගරයේ පාසලකට එල්ල වූ ප්‍රහාරයකින් ළමුන් ඇතුළු 160 දෙනෙකු මියගොස් ඇති බවට ඉරානය චෝදනා කරන අතර, ඊට ප්‍රතිචාර ලෙස ටෙල් අවිව් නුවරට සහ කලාපයේ ඇමරිකානු කඳවුරුවලට ඉරානය විසින් මිසයිල සහ ඩ්‍රෝන ප්‍රහාර එල්ල කරමින් සිටියි. කුවේට්හි පිහිටි ඇමරිකානු තානාපති කාර්යාලයෙන් ද දුමාරයක් මතුවන බව වාර්තා වන අතර, හෝමුස් සමුද්‍ර සන්ධිය හරහා සිදුවන බලශක්ති සැපයුමට එල්ල වී ඇති මෙම බාධාව ගෝලීය ආර්ථිකයට ඉදිරියේදී දැඩි බලපෑමක් එල්ල කරනු ඇතැයි අපේක්ෂා කෙරේ.
