දික්වැල්ල සහ මහව විවිධ සේවා සමූපකාර සමිතිවල කාරක සභා නිලවරණවලින් සමගි ජන බලවේගය ප්‍රමුඛ ඒකාබද්ධ පොදු විපක්ෂය ජයග්‍රහණය අත්පත් කර ගැනීමට සමත්ව තිබේ. දික්වැල්ල විවිධ සේවා සමූපකාර සමිතියේ නිලවරණයේදී පාලක ජාතික ජන බලවේගය අභිබවා බහුතර බලය තහවුරු කර ගැනීමට පොදු විපක්ෂය සමත් විය. ප්‍රාදේශික මට්ටමෙන් පැවැති ඡන්ද විමසීමේදී පොදු විපක්ෂය ඡන්ද 35ක් ලබා ගන්නා විට, ජාතික ජන බලවේගය සහාය දුන් කණ්ඩායමට ලබාගත හැකි වූයේ ඡන්ද 19ක් පමණි.
එසේම, මහ සභා නියෝජිතයන් තේරීමේදී ද පොදු විපක්ෂය කැපී පෙනෙන දස්කම් දැක්වූ අතර, සමස්ත නියෝජිතයන් 98 දෙනාගෙන් 70 දෙනෙකුගේම සහය දිනා ගැනීමට ඔවුන් සමත් විය. එහිදී ජාතික ජන බලවේගයට හිමිවූයේ නියෝජිත ධුර 28ක් පමණක් බව වාර්තා වේ. මෙම ප්‍රතිඵලය හරහා දික්වැල්ල ප්‍රදේශයේ සමූපකාර පද්ධතියේ පාලන බලය විපක්ෂය සතු වී තිබේ.
මේ අතර මහව සමූපකාර සමිතිය සඳහා පැවැති නිලවරණයෙන් ද ඒකාබද්ධ පොදු විපක්ෂය දැවැන්ත ජයග්‍රහණයක් වාර්තා කර ඇත. එහිදී ඒකාබද්ධ පොදු විපක්ෂය නියෝජිත ධුර 82ක් ජයග්‍රහණය කරන විට, ජාතික ජන බලවේගය සහාය දුන් කණ්ඩායමට ජයගත හැකි වූයේ නියෝජිත ධුර 18ක් පමණි. මෑත කාලීනව පැවැති සමූපකාර නිලවරණ රැසකදීම විපක්ෂ කණ්ඩායම් මෙලෙස ජයග්‍රහණය කිරීම දේශපාලන කරළියේ දැඩි අවධානයට ලක්ව ඇති කරුණකි.
