දිවයිනට බලපා ඇති වැසි සහිත කාලගුණ තත්ත්වයෙන් විපතට පත් ජනතාවට කඩිනම් සහන සලසන්නැයි ජනාධිපති මෛත‍්‍රීපාල සිරිසේන මහතා අදාළ අංශවලට උපදෙස් දී තිබෙනවා. දෙදින රාජ්‍ය සංචාරයක් සඳහා සීෂෙල්ස් රාජ්‍යයට ගොස් සිටින ජනාධිපතිවරයා ආපදා කළමනාකරණ අමාත්‍ය දුමින්ද දිසානායක අමතා මෙම උපදෙස් ලබාදී ඇති බවයි ජනාධිපති මාධ්‍ය අංශය පැවසුවේ.
විපතට පත් ජනතාවට සහන සැලසීමේ දී කිසිදු අවස්ථාවක මූල්‍ය ප‍්‍රතිපාදන ගැටලූවක් කර නොගන්නා ලෙසයි ජනධිපතිවරයා මෙහිදී සදහන් කර ඇත්තේ. වියළි ආහාර ද්‍රව්‍ය, පානීය ජලය සහ සෞඛ්‍ය පහසුකම් ඇතුළුව විපතට පත් ජනතාවට අවශ්‍ය සුබසාධන වැඩපිළිවෙළ අඛණ්ඩව කි‍්‍රයාත්මක කරන ලෙසද ජනාධිපතිවරයා නියෝග කර තිබෙනවා. විපතට පත් ජනතාව මුදා ගැනීමේ කටයුතු සඳහා ත‍්‍රිවිධ හමුදාවේ සහය ලබාගැනීමට ද ජනාධිපතිතුමා ආරක්ෂක මාණ්ඩලික ප‍්‍රධානී අද්මිරාල් රවීන්ද්‍ර විජේගුණරත්න වෙත උපදෙස් ලබාදි ඇති බවයි ජනාධිපති මාධ්‍ය අංශය පැවසුවේ.
(under the courtesy of nethnews.lk news web)
