යෝජිත ගෙවල්කුළි පනත ඒ ආකාරයෙන්ම සම්මත කළහොත් රටේ නීතිය මුළුමනින්ම විකෘති වී, නීතිය කෙරෙහි මහජනතාව තබා ඇති විශ්වාසය බිඳ වැටෙනු ඇති බව හිටපු අධිකරණ අමාත්‍ය, ජනාධිපති නීතිඥ ආචාර්ය විජේදාස රාජපක්ෂ මහතා අනතුරු අඟවයි. මෙම පනත මගින් යම් දේපළක පුද්ගලයෙකු නීති විරෝධීව පදිංචිව සිටියද, ඔවුන්ගේ අයිතිවාසිකම් ආරක්ෂා කිරීමට කටයුතු කර ඇති බවත්, ඒ හේතුවෙන් දේපළෙහි සැබෑ හිමිකරුට කිසිදු සාධාරණයක් ඉටු නොවන බවත් ඔහු පෙන්වා දෙයි.
මෙය විශාල නීතිමය විකෘතියක් බව පවසන විජේදාස රාජපක්ෂ මහතා, මෙමගින් ජනතාව කබලෙන් ළිපට වැටෙන තත්ත්වයක් උදාවන බව ප්‍රකාශ කරයි. විශේෂයෙන්ම නිවාස හිමියන්ට තම දේපළවල පදිංචිකරුවන් නීත්‍යානුකූලව පවා ඉවත් කර ගැනීමට නොහැකි බරපතළ වාතාවරණයක් මෙම පනත හරහා නිර්මාණය වන බව ඔහු වැඩිදුරටත් අවධාරණය කළේය. දේපළ අයිතිය සම්බන්ධයෙන් පවතින මූලික නීතිමය මූලධර්ම මෙමගින් අභියෝගයට ලක් වන බව ඔහුගේ අදහසයි.
