හිටපු ජනාධිපති රනිල් වික්‍රමසිංහ මහතාගේ ධුර කාලය අවසන් වීමෙන් පසු ජනාධිපති ලේකම් කාර්යාලය වෙත භාර දෙන ලද වාහන 68ක ලියාපදිංචි අංක ලබා දීම, තොරතුරු දැනගැනීමේ අයිතිවාසිකම පිළිබඳ (RTI) පනත යටතේ කළ ඉල්ලීමක් මත ජනාධිපති ලේකම් කාර්යාලය විසින් ප්‍රතික්ෂේප කර තිබේ. නිදහස් මාධ්‍යවේදී රාහුල් සමන්ත හෙට්ටිආරච්චි මහතා විසින් 2024 සැප්තැම්බර් 23 දිනෙන් පසු භාර දුන් වාහනවලට අදාළ විස්තර ඉල්ලා මෙම තොරතුරු ඉල්ලුම්පත්‍රය යොමු කර තිබුණි.
මෙම ඉල්ලීම ප්‍රතික්ෂේප කරමින් ජනාධිපති ලේකම් කාර්යාලය 2026 ජනවාරි 02 දිනැති ලිපියක් මගින් දන්වා සිටියේ අදාළ තොරතුරු ලබා දිය නොහැකි බවයි. තොරතුරු දැනගැනීමේ අයිතිවාසිකම පිළිබඳ පනතේ 5(1)(අ) වගන්තිය ප්‍රකාරව, ඉල්ලා ඇති තොරතුරු පුද්ගලික තොරතුරු ගණයට වැටෙන බැවින් ඒවා අනාවරණය කළ නොහැකි බව එම ලිපියේ සඳහන් වේ. රාජ්‍ය දේපළවලට අදාළ ලියාපදිංචි අංක පෞද්ගලික තොරතුරු ලෙස වර්ගීකරණය කිරීම මෙහිදී විශේෂත්වයකි.
මාස කිහිපයක උත්සාහයකින් පසුව තොරතුරු පනත යටතේ ඇතැම් දත්ත තමන් වෙත ලැබුණු නමුත්, අදාළ වාහන 68හි ලියාපදිංචි අංක පිළිබඳ තොරතුරු ලබා දීම බලධාරීන් මෙතෙක් ප්‍රතික්ෂේප කර ඇති බව මාධ්‍යවේදී හෙට්ටිආරච්චි මහතා සඳහන් කළේය. රජයේ වාහන අවභාවිතය පිළිබඳව සමාජය තුළ දැඩි කතාබහක් පවතින පසුබිමක, එම වාහන පිළිබඳ නිශ්චිත තොරතුරු ලබා නොදීම විනිවිදභාවය පිළිබඳ ගැටලු මතු කරන බව විචාරකයෝ පෙන්වා දෙති.
