ආහාර විෂවීමක් ඇති කළ හැකි විෂ ද්රව්යයක් අඩංගු විය හැකි බවට පවතින සැකය මත, නෙස්ලේ (Nestlé) සමාගම සිය ළදරු කිරිපිටි නිෂ්පාදන කිහිපයක් ලොව පුරා වෙළඳපොළෙන් ඉවත් කර ගැනීමට තීරණය කර ඇත. අදාළ නිෂ්පාදන කාණ්ඩවල ‘Bacillus cereus’ බැක්ටීරියාව මගින් නිපදවන ‘cereulide’ නමැති විෂ ද්රව්යය අඩංගු වීමේ අවදානමක් පවතින බව සමාගම අවධාරණය කරයි. මෙම විෂ ද්රව්යය ශරීරගත වීමෙන් වමනය, ඔක්කාරය සහ උදරයේ කැක්කුම වැනි රෝග ලක්ෂණ මතු විය හැකි අතර, බ්රිතාන්ය ආහාර ප්රමිති නියෝජිතායතනය පෙන්වා දෙන්නේ ජලය තැම්බීමේදී හෝ කිරි සකස් කිරීමේදී පවා මෙම විෂ ද්රව්යය විනාශ නොවන බවයි.
මෙම ආපසු කැඳවීම යටතේ SMA ළදරු කිරිපිටි, ප්රංශයේ අලෙවි කළ Guigoz සහ Nidal, මෙන්ම ජර්මනියේ අලෙවි කළ Beba සහ Alfamino වැනි නිෂ්පාදනවල නිශ්චිත කාණ්ඩ ඇතුළත් වේ. ප්රංශය, ජර්මනිය, ඉතාලිය සහ එක්සත් රාජධානිය ඇතුළු යුරෝපීය රටවල් රැසක මෙම නිෂ්පාදන අලෙවියට නිකුත් කර තිබේ. මෙතෙක් කිසිදු දරුවෙකු අසනීප වූ බවට වාර්තා වී නොමැති වුවද, සැපයුම්කරුවෙකුගෙන් ලැබුණු අමුද්රව්යයක පවතින දෝෂයක් හේතුවෙන් පූර්ව ආරක්ෂණ පියවරක් ලෙස මෙම තීරණය ගත් බව නෙස්ලේ සමාගම නිවේදනය කර ඇත.
පාරිභෝගිකයන්ට මුදල් ආපසු ගෙවීමට සමාගම එකඟ වී ඇති අතර, දෙමාපියන් තම සන්තකයේ ඇති කිරිපිටි ඇසුරුම්වල පතුලෙහි සඳහන් කාණ්ඩ අංකය පරීක්ෂා කළ යුතුය. යම් හෙයකින් මෙම නිෂ්පාදන දරුවෙකුට ලබා දී ඇත්නම් සහ සෞඛ්ය ගැටලුවක් පිළිබඳ සැකයක් පවතී නම් වහාම වෛද්ය උපදෙස් ලබා ගන්නා ලෙස බලධාරීහු උපදෙස් දෙති. කෙසේ වෙතත්, මෙම ආපසු කැඳවීමට අදාළ නොවන සෙසු සියලුම නෙස්ලේ නිෂ්පාදන භාවිතය ආරක්ෂිත බව සමාගම වැඩිදුරටත් සහතික කර ඇත.
