ලෝක වෙළඳපොළේ ඉන්ධන මිලෙහි සිදු වූ වෙනස්වීම්වලට සාපේක්ෂව මෙරට ජනවාරි මාසය සඳහා වන ඉන්ධන මිල සංශෝධනය මෙම සතිය ඇතුළත ප්‍රකාශයට පත් කිරීමට නියමිතය. සාමාන්‍යයෙන් සෑම මසකම අවසාන දිනයේදී මිල සූත්‍රය අනුව ඉන්ධන මිල සංශෝධනය ප්‍රකාශයට පත් කළද, මෙවර එම ක්‍රියාවලිය දින කිහිපයකින් ප්‍රමාද වී තිබේ.
පසුගිය මාසය පුරා ලෝක වෙළඳපොළේ ඉන්ධන මිලෙහි සුළු පහළ යාමක් දක්නට ලැබුණු බැවින්, එම වාසිය මෙරට පාරිභෝගිකයන්ට ලබා දීම පිළිබඳව බලධාරීන්ගේ අවධානය යොමු වී ඇත. ලංකා ඛනිජ තෙල් නීතිගත සංස්ථාව සහ විෂයභාර අමාත්‍යාංශය මේ වන විට මිල සූත්‍රයට අනුව අදාළ ගණනය කිරීම් සිදු කරමින් පවතින අතර, ඉදිරි දින කිහිපය තුළ නව මිල ගණන් නිල වශයෙන් නිවේදනය කිරීමට නියමිතය.
