ගංවතුරෙන් ගැටඹේ ජල පොම්පාගාරයට හානි වීම හේතුවෙන් මහනුවර නගරයේ නළ ජල සැපයුම සම්පූර්ණයෙන්ම අකර්මණ්‍ය වී ඇත. අලුත්වැඩියා කටයුතු නිම වන තෙක් ජල සැපයුම යථා තත්ත්වයට පත් කිරීමට දින කිහිපයක් ගත වනු ඇති බව නගර සභා ජල කර්මාන්ත අංශය පවසයි.
රෝහලට ගුවන් හමුදා සහාය
ජල හිඟය මහනුවර ජාතික රෝහලටද දැඩි ලෙස බලපා ඇති අතර, රෝහලේ නියෝජ්‍ය අධ්‍යක්ෂ රවීන්ද්‍ර වැලිවිට මහතාට අනුව ශ්‍රී ලංකා ගුවන් හමුදාව සහ පෞද්ගලික ආයතන කිහිපයක් රෝහලට අවශ්‍ය පානීය ජල බෝතල් සැපයීමට ඉදිරිපත් වී තිබේ.
මේ අතර, වෙළෙඳපොළේ පවතින උග්‍ර ජල බෝතල් හිඟය ප්‍රයෝජනයට ගන්නා ඇතැම් වෙළඳුන් රුපියල් 35ක් වූ ජල බෝතලයක් රුපියල් 100ක් දක්වා ඉහළ මිලකට අලෙවි කරමින් සිටින බව මහජනතාව චෝදනා කරයි.
