මහින්ද රාජපක්ෂ ආණ්ඩුව හඳුන්වා දීමට සූදානම් වූ ඩිජිටල් හැඳුනුම්පත සහ වර්තමාන ආණ්ඩුව හඳුන්වා දෙන ඩිජිටල් හැඳුනුම්පත එකක් නොව දෙකක් බව පාර්ලිමේන්තු මන්ත්‍රී නජිත් ඉන්දික පවසයි.
එදා එම ව්‍යාපෘතියේ ක්‍රියාත්මක කළේ එම දත්ත සඳහා ඉන්දියාවට ද පිවිසීමේ හැකියාව සහිතව බවයි, ඔහු පෙන්වා දුන්නේ. තමන් ඇතුළු පිරිස එදා ඊට එරෙහි වූයේ ඒ නිසා බව ද හෙතෙම ප්‍රකාශ කරයි.
එහෙත් වර්තමාන ව්‍යාපෘතිය කොටස් දෙකකට වෙන්කර ඇති බවත් මෘදුකාංගය නිර්මාණය කිරීම පමණක් ඉන්දියාව සිදුකරන බවත් නජිත් ඉන්දික සඳහන් කරයි.
අනතුරුව ඊට අදාළ දත්ත ගබඩා කිරීම සිදුකරන්නේ ලංකාවේ පිරිසක් වන අතර එම දත්ත රාජ්‍ය ආයතනයකට පවා නැවත ලබාගත නොහැකි බව ද ඔහු අවධාරණය කරයි.
සිරස සටන වැඩසටහනට එකතු වෙමින් නජිත් ඉන්දික මේ බව කීය.
