අද දින අළුයම් කාලයේ දික්වැල්ල පොලිස් වසමේ වලස්ගල දොරමුරේ පාර පශු වෛද්‍ය කාර්යාලය ආසන්නයේදී යතුරු පැදියකින් ගමන් කරමින් සිටි පුද්ගලයෙකුට වෙඩි තබා ඝාතනය කර ඇති බවට දික්වැල්ල පොලිස් ස්ථානයට ලද පණිවිඩයක් මත විර්මශන ආරම්භ කර ඇත.
මරණකරු වයස අවුරුදු 48 ක් වූ වලස්ගල ප්‍රදේශයේ පදිංචි රියදුරු රැකියාවේ නිරතව සිටි පුද්ගලයෙකි.
වෙඩි තැබීම සඳහා සැකකරුවන් පැමිණි ආකාරය සම්බන්ධයෙන් මෙතෙක් තොරතුරු අනාවරණය වී නොමැත.
සැඟව සිටින සංවිධානාත්මක අපරාධකරුවෙකුගේ නමින් ප්‍රදේශයේ පුද්ගලයෙකුගෙන් කප්පම් මුදල් ලබා ගැනීමක් සම්බන්ධයෙන් මරණකරුට එරෙහිව අධිකරණයේ නඩුවක් විභාග වන බැවින්, මෙම වෙඩි තැබීම හා අදාල කප්පම් ගැනීමේ සිද්ධිය අතර යම් සම්බන්ධතාවයක් පවතීද යන්න විමර්ශන නිලධාරීන්ගේ අවධානයට යොමු වී ඇත.
වෙඩි තැබීම සඳහා ටී 56 වර්ගයේ ගිනි අවියක් භාවිතා කර ඇති බවට පොලිසිය සැකකරනු ලබයි. සැකකරුවන් අත්අඩංගුවට ගැනීම සඳහා දික්වැල්ල පොලිසිය වැඩිදුර විර්මශන සිදුකරනු ලබයි.
