නඩත්තු මුදල් ගෙවීම පැහැර හැරීම නිසා සිරදඬුවම් විඳිමින් සිටි පුද්ගලයෙකුට 2024 සැප්තැම්බර් මාසයේදී පොදු සමාව යටතේ හිටපු ජනාධිපති රනිල් වික්‍රමසිංහ මහතා විසින් ලබා දී තිබූ සිරදඬුවම් ලිහිල් කිරීම/කපා හැරීම බලරහිත සහ අහෝසි බවට ශ්‍රේෂ්ඨාධිකරණය තීන්දු කර ඇත. එම තීරණය මඟින් ආණ්ඩුක්‍රම ව්‍යවස්ථාවෙන් සහතික කර ඇති නීතිය ඉදිරියේ සමානත්වයට සහ නීතියේ සමාන ආරක්ෂාවට ඇති මූලික අයිතිවාසිකම උල්ලංඝනය වී ඇති බව අධිකරණය ප්‍රකාශ කළේය.
ජනක් ද සිල්වා, ඩොක්ටර් ශෝභිත රාජකරුණා සහ සම්පත් විජේරත්න යන ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල තීන්දු කළේ, අදාළ පුද්ගලයාගේ සිරදඬුවම් වරෙන්තුවේ එය “දඩ මුදලක්” නොගෙවීම වෙනුවෙන් වූ දඬුවමක් ලෙස සඳහන් කර තිබීම හේතුවෙන් ඔහුට විශේෂ වරප්‍රසාද හිමිව ඇති බවයි. එමෙන්ම නඩත්තු මුදල් නොගෙවීම වෙනුවෙන්ම සිරදඬුවම් විඳි වෙනත් පුද්ගලයෙකුට හිමිව තිබුණේ සතියක සිරදඬුවම් ලිහිල් කිරීමක් පමණක් බවද අධිකරණය පෙන්වා දුන්නේය.
වරෙන්තුවල අඩංගු වචන භාවිතය මත පදනම්ව මෙලෙස වෙනස්කම් කිරීම සඳහා කිසිදු සබ්බෑ නීතිමය පදනමක් නොමැති බවත්, පුද්ගලයන් දෙදෙනාම සිරගත කර ඇත්තේ නඩත්තු මුදල් ගෙවීම පැහැර හැරීම නිසා බවත් අධිකරණය සඳහන් කළේය. ඒ අනුව හිටපු ජනාධිපතිවරයා, සෞඛ්‍ය හා අධිකරණ අමාත්‍යාංශයේ ලේකම්වරයා සහ බන්ධනාගාර කොමසාරිස් ජනරාල්වරයා ආණ්ඩුක්‍රම ව්‍යවස්ථාවේ 12(1) වගන්තිය උල්ලංඝනය කර ඇති බව ශ්‍රේෂ්ඨාධිකරණය නිගමනය කළේය.
කොළඹ නැගෙනහිර කාසි (Quazi) අධිකරණය මඟින් සිය හිටපු සැමියාගෙන් රුපියල් 60,000ක නඩත්තු මුදලක් අයකර දීමට නියෝග කර තිබූ අහමඩ් ජලීල් ෆාමිල්ලා බෙගම් (Ahamend Jaleel Farmilla Begum) නමැති තැනැත්තිය විසින් ගොනු කරන ලද මූලික අයිතිවාසිකම් පෙත්සමක් විභාග කරමින් ශ්‍රේෂ්ඨාධිකරණය මෙම තීන්දුව ලබා දුන්නේය.
අදාළ නියෝගයට අනුව කටයුතු කිරීමට අපොහොසත් වීම නිසා මීගමුව මහේස්ත්‍රාත් අධිකරණය විසින් හිඟ නඩත්තු මුදල වන රුපියල් මිලියන 1.74ක් (රුපියල් ලක්ෂ 17.4ක්) අයකර ගැනීම සඳහා ක්‍රියාත්මක කිරීමේ සහතිකයක් නිකුත් කර තිබූ අතර, ඊට අදාළව හිටපු සැමියාට මාස 29ක සිරදඬුවමක් නියම වී 2024 ජූලි මාසයේදී බන්ධනාගාරගත කෙරිණි.
කෙසේ වෙතත්, බන්ධනාගාර දින සැමරුම වෙනුවෙන් එකල අධිකරණ අමාත්‍යවරයා කළ නිර්දේශයක් මත පදනම්ව අදාළ පුද්ගලයාගේ ඉතිරි සිරදඬුවම කපා හැර 2024 සැප්තැම්බර් 12 වැනිදා ඔහු නිදහස් කර තිබිණි.
එම සිරදඬුවම් ලිහිල් කිරීම අත්තනෝමතික බවත්, ඒ හේතුවෙන් තමන්ට හිමිවිය යුතු හිඟ නඩත්තු මුදල් අයකර ගැනීමට තිබූ හැකියාව අහිමි වූ බවත් පවසමින් පෙත්සම්කාරිය මෙම පෙත්සම ගොනු කළාය. නඩත්තු මුදල් නොගෙවීම නිසා සිරගතව සිටි මොහොමඩ් ෆයිසාල් මොහොමඩ් නව්ෂාඩ් නමැති වෙනත් පුද්ගලයෙකුට එවැනි වරප්‍රසාදයක් හිමි නොවූ බවද ඇය පෙන්වා දුන්නාය.
පොදු සමාව ලබාදෙන අවස්ථාව වන විට නව්ෂාඩ් නැමැත්තා මාස 27ක සිරදඬුවමෙන් මාස 8ක් පමණ විඳ තිබුණද ඔහුට හිමිව තිබුණේ සතියක ලිහිල් කිරීමක් පමණි. නමුත් පෙත්සම්කාරියගේ හිටපු සැමියා මාස 29ක සිරදඬුවමෙන් මාස 2කටත් අඩු කාලයක් විඳ තිබියදී ඔහුගේ ඉතිරි මුළු දඬුවම් කාලයම කපා හැරීමට කටයුතු කර තිබූ බව ශ්‍රේෂ්ඨාධිකරණය මෙහිදී නිරීක්ෂණය කළේය.
