සුළි කුණාටුවෙන් රටට බලපෑ මහා පරිමාණ නාය යාම් කිහිපයකම අතුරුදහන් වූවන් සෙවීමේ මෙහෙයුම් තාවකාලිකව අත්හිටුවීමට සහන කණ්ඩායම්වලට සිදුව ඇති බව වාර්තා වේ.
මෙම ඛේදජනක තීරණයට හේතුවී ඇත්තේ මාර්ග බරපතළ ලෙස අවහිර වී තිබීම නිසා එම ස්ථානවලට ළඟාවීමට නොහැකි වීම සහ දැවැන්ත ලෙස නාය ගිය පස් කඳු යට තවදුරටත් මෙහෙයුම් කිරීම අතිශය දුෂ්කර වීමයි.
භයානක අනුමානය:
සහන කණ්ඩායම් පෙන්වා දෙන්නේ, අලවතුගොඩ, උඩුදුම්බර, මීමුරේ, ගම්පොළ සහ රඹුක්කන වැනි ප්‍රදේශවල නාය ගිය මහ පස් කඳුවලට යටවී තවත් සැලකිය යුතු මළ සිරුරු ප්‍රමාණයක් තිබිය හැකි බවට බරපතළ අනුමානයක් පවතින බවයි.
නිවැරදි සංඛ්‍යා පවා නැත:
මෙම ප්‍රදේශවල සිදු වූ මහා පරිමාණ නාය යාම්වලින් අතුරුදහන් වූවන්ගේ නිවැරදි සංඛ්‍යාලේඛන පවා මේ වන තෙක් සකස් කර ගැනීමට නොහැකි වී ඇත.
කෙසේ වෙතත්, අවහිර වූ මාර්ග හැකි ඉක්මනින් ගමනාගමනයට හැකි තත්ත්වයකට පත් වූ වහාම, ඉතිරි අතුරුදහන් වූවන් සොයා සෙවීමේ මෙහෙයුම් නැවත ආරම්භ කිරීමට සහන කණ්ඩායම් සූදානමින් සිටින බව වාර්තා වේ.
