ලෝකයේ වඩාත්ම තීරණාත්මක තෙල් ප්රවාහන මාර්ගයක් වන හෝමුස් සමුද්ර සන්ධිය වසා දැමීමට ඉරාන විප්ලවීය ආරක්ෂක බලකාය (IRGC) පියවර ගෙන තිබේ. ඉරාන විප්ලවීය ආරක්ෂක බලකායේ ජ්යෙෂ්ඨ උපදේශක එබ්රහීම් ජබාරි ප්රකාශ කළේ, මෙම සමුද්ර සන්ධිය හරහා ගමන් කිරීමට උත්සාහ කරන ඕනෑම නෞකාවකට ප්රහාර එල්ල කර ඒවා ගිනිබත් කරන බවයි. පසුගිය සෙනසුරාදා ඊශ්රායලය සහ ඇමරිකාව විසින් ටෙහෙරාන් සහ බීරූට් නගරවලට එල්ල කරන ලද බෝම්බ ප්රහාරවලට ප්රතිචාරයක් ලෙස මෙම දැඩි තීරණය ගෙන ඇත.
එම ප්රහාරවලින් ඉරාන උත්තරීතර නායක අයතුල්ලා අලි කමේනි ඇතුළු ජ්යෙෂ්ඨ නිලධාරීන් පිරිසක් ජීවිතක්ෂයට පත්වීම මෙම උණුසුම්කාරී තත්ත්වය උග්ර වීමට ප්රධාන හේතුව වී තිබේ. ලෝක තෙල් සැපයුමෙන් 20%ක් පමණ ගමන් කරන මෙම මුහුදු මාර්ගය අවහිර වීමත් සමඟ, ඉදිරි දිනවලදී තෙල් බැරලයක මිල ඩොලර් 200 දක්වා ඉහළ යා හැකි බවට ඉරානය අනාවැකි පළ කරයි. මේ වන විටත් යුරෝපයේ ස්වභාවික වායු මිල 50%කින් ඉහළ ගොස් ඇති අතර, කටාර් බලශක්ති සමාගම ද සිය ද්රව ස්වභාවික වායු නිෂ්පාදනය තාවකාලිකව නතර කර ඇත.
මේ අතර සෞදි අරාබියේ ‘රස් ටැනුරා’ තෙල් පිරිපහදුවට එල්ල වූ ඩ්රෝන ප්රහාර මැඩපැවැත්වීමට සෞදි ආරක්ෂක අංශ සමත්ව ඇති බව වාර්තා වේ. පවතින බලශක්ති අර්බුදය පාලනය කිරීම සඳහා හෙට සිට විශේෂ පියවර ගන්නා බව ඇමරිකානු රාජ්ය ලේකම් මාර්කෝ රූබියෝ ප්රකාශ කර තිබේ. මෙම තත්ත්වය ලෝක ආර්ථිකයට මෙන්ම මෙරට ඉන්ධන මිල කෙරෙහි ද සෘජුව බලපානු ඇතැයි අපේක්ෂා කෙරේ.
