පාරිභෝගිකයන් අනවශ්ය ලෙස කලබල වී ඉන්ධන රැස් කිරීමට කටයුතු කළහොත්, බෙදාහැරීමේ පද්ධතියට එල්ල වන පීඩනය පාලනය කිරීම සඳහා නැවතත් QR ක්රමවේදයක් ක්රියාත්මක කිරීමට සිදුවිය හැකි බව බලශක්ති නියෝජ්ය අමාත්ය අක්රම් ඉල්යාස් මහතා අනතුරු අඟවයි. රට තුළ දැනට ප්රමාණවත් ඉන්ධන සංචිත පවතින බැවින් ජනතාව අනවශ්ය ලෙස කලබල විය යුතු නැති බව අමාත්යවරයා අවධාරණය කළේය.
මේ වන විට මෙරට පවතින ඉන්ධන සංචිත පිළිබඳව දත්ත ඉදිරිපත් කරමින් ඔහු කියා සිටියේ පෙට්රල් දින 37කටත්, ඩීසල් දින 35කටත්, ගුවන් ඉන්ධන දින 47කටත් සහ සුපර් ඩීසල් දින 30කට වැඩි කාලයකටත් ප්රමාණවත් පරිදි පවතින බවයි. ශ්රී ලංකාවට අවශ්ය ඉන්ධන වැඩි වශයෙන් මිලදී ගනු ලබන්නේ සිංගප්පූරුව, මැලේසියාව සහ කොරියාව වැනි රටවලින් බැවින් සැපයුම සම්බන්ධයෙන් බියක් ඇති කර ගත යුතු නැති බව ද අමාත්යවරයා පෙන්වා දුන්නේය.
කෙසේ වෙතත්, ජනතාව සාමාන්ය අවශ්යතාවයට වඩා වැඩිපුර ඉන්ධන ගබඩා කිරීමට උත්සාහ කළහොත් ප්රවාහන ජාලය අඩපණ විය හැකි බව පෙන්වා දුන් අමාත්යවරයා, බූලි සහ වෙනත් බඳුන්වලට ඉන්ධන ලබාගැනීම වැළැක්වීමට පොලිසියට උපදෙස් දී ඇති බව ද පැවසීය. ඉන්ධන බෙදාහැරීමේ කටයුතු අඛණ්ඩව පවත්වාගෙන යාම සඳහා ඛනිජ තෙල් නීතිගත සංස්ථාවේ සේවකයන්ගේ නිවාඩු පවා අවලංගු කර ඇති අතර බෙදාහැරීම් කටයුතු මේ වන විට සාමාන්ය පරිදි සිදු කෙරෙන බව ඔහු වැඩිදුරටත් සහතික කළේය.
