කවුරුන් කිනම් ආකාරයකින් බාධා කිරීමට උත්සාහ කළද නව අධ්යාපන ප්රතිසංස්කරණ අනිවාර්යයෙන්ම ක්රියාත්මක කරන බව ජනාධිපති අනුර කුමාර දිසානායක මහතා අවධාරණය කරයි. වර්තමානයේ පවතින අධ්යාපන ක්රමය මහා සංඝරත්නය මෙන්ම පොදු ජනතාව ද අපේක්ෂා කරන මට්ටමේ නොමැති බවත්, එය දෙමව්පියන්ට දැඩි ආර්ථික බරක් සහ දරුවන්ට පීඩාවක් ගෙන දෙන පද්ධතියක් බවත් ඔහු පෙන්වා දෙයි. කාලාන්තරයක් තිස්සේ අධ්යාපනඥයින් විසින් යෝජනා කරන ලද මෙම වෙනස්කම් සඳහා රජය මැදිහත් වී ඇති මොහොතක, ඊට එරෙහිව පදනම් විරහිත අසත්ය ප්රකාශ පතුරුවමින් පවතින බව ද ජනාධිපතිවරයා ප්රකාශ කළේය.
ගම්බද පවුල් පවතින දුප්පත්කමින් මුදාගැනීමේ ප්රධානතම මාවත අධ්යාපනය බව පෙන්වා දුන් ජනාධිපතිවරයා, දරුවෙකුට ගුණාත්මක අධ්යාපනයක් ලබා දීම තුළින් මුළු පවුලම දියුණුව කරා ගෙන යා හැකි බව පවසයි. වර්තමානයේ දරුවෙකුගේ අධ්යාපනය පවුලකට දරාගත නොහැකි බරක් වී ඇති තත්ත්වය වෙනස් කර, ලෝකයේ ඕනෑම රටක් සමඟ තරඟ කළ හැකි ජාත්යන්තර මට්ටමේ වටිනාකමක් සහිත අධ්යාපනයක් ශ්රී ලාංකේය දරුවන්ට උරුම කර දීම රජයේ මූලික අභිප්රාය බව ඔහු තහවුරු කළේය. මෙම නව වෙනස්කම් මගින් දරුවන්ට තම ජීවිතය සාර්ථක කර ගැනීමට අවශ්ය සුදුසු පරිසරය සැකසෙනු ඇති බවට ද ඔහු විශ්වාසය පළ කරයි.
