2016 වසරේ බංග්ලාදේශ මහ බැංකුවට එල්ල වූ මහා පරිමාණ සයිබර් ප්‍රහාරයකින් අමෙරිකානු ඩොලර් මිලියන 20ක මූල්‍ය වංචාවක් වැළැක්වීමට ශ්‍රී ලංකාවේ පාන් ඒෂියා බැංකු සංස්ථාවේ නිලධාරීන් දැක්වූ කැපවීම ඇගයීමට ලක් කරමින්, බංග්ලාදේශ මහ බැංකුව විසින් විශේෂ සම්මාන ප්‍රදානෝත්සවයක් පවත්වා තිබෙනවා. මෙය දෙරට අතර පවතින ශක්තිමත් බැඳීම් තහවුරු කරන සුවිශේෂී අවස්ථාවක් ලෙස සැලකෙනවා.
බංග්ලාදේශ මහ බැංකු අධිපති ආචාර්ය අහ්සන් එච්. මන්සූර් මහතා පෙන්වා දුන්නේ, “මෙම ඇගයීම විධිමත් පිළිගැනීමකට වඩා, දේශසීමා ඉක්මවා යන ආචාර ධර්ම, බුද්ධිය සහ මානුෂීය වටිනාකම් සඳහා කරන උපහාරයක්” බවයි. ශ්‍රී ලාංකික බැංකුකරුවන්ගේ “ආදර්ශමත් වෘත්තීයභාවය සහ අවංකභාවය” නිසා ගෝලීය බැංකු පද්ධතියේ අඛණ්ඩතාව පිළිබඳ විශ්වාසය තහවුරු වූ බව ද ඔහු කියා සිටියා.
බංග්ලාදේශ පොලිස්පති ආචාර්ය බහරුල් අලම් මහතා ද ශ්‍රී ලාංකික නිලධාරීන්ගේ කඩිසරකම සහ විමර්ශන සඳහා දැක්වූ පූර්ණ සහයෝගය වෙනුවෙන් සිය ස්තුතිය පළ කළා. මෙම උත්සවය “දේශසීමා සහයෝගීතාව සහ ආයතනික වගවීම යළි තහවුරු කිරීමේ සංකේතයක්” බව ඔහු වැඩිදුරටත් පැවසුවා.
මෙම ඓතිහාසික අවස්ථාවට බංග්ලාදේශ මහ බැංකු අධිපති, පොලිස්පති, බංග්ලාදේශයේ ශ්‍රී ලංකා මහ කොමසාරිස්, ශ්‍රී ලංකා මහ බැංකුවේ තොරතුරු තාක්ෂණ අධ්‍යක්ෂවරයා සහ පාන් ඒෂියා බැංකු සංස්ථාවේ ප්‍රධාන විධායක නිලධාරී නලීන් එදිරිසිංහ මහතා ඇතුළු ප්‍රධාන පෙළේ නියෝජිතයන් රැසක් සහභාගී වී සිටියා.
මෙහිදී මූල්‍ය අපරාධ වැළැක්වීම, සයිබර් ආරක්ෂාව සහ නියාමන සම්බන්ධීකරණය වැනි ක්ෂේත්‍රවලදී දෙරට අතර සහයෝගීතාව තවදුරටත් ශක්තිමත් කිරීමට එකඟතාව පළ කිරීම ද විශේෂත්වයක්.
