පාස්කු ඉරුදින එල්ල වූ මරාගෙන මැරෙන බෝම්බ ප්රහාර මාලාව සම්බන්ධයෙන් විමර්ශනය කළ ජනාධිපති පරීක්ෂණ කොමිෂන් සභා වාර්තාව මගින් වගකිවයුතු යැයි නම් කර ඇති පුද්ගලයන්ට එරෙහිව වහාම විමර්ශන ආරම්භ කරන ලෙස නීතිපතිවරයා අපරාධ පරීක්ෂණ දෙපාර්තමේන්තුවට (CID) උපදෙස් දී ඇත. අදාළ කොමිෂන් සභා වාර්තාවේ ඇතුළත් නිර්දේශයන් මැනවින් අධ්යයනය කර, ඒ සම්බන්ධයෙන් නීතිමය පියවර ගන්නා ලෙස නීතිපතිවරයා වැඩිදුරටත් දැනුම් දී තිබේ.
අධිකරණ විනිසුරු ජනක් ද සිල්වා මහතාගේ සභාපතිත්වයෙන් යුත් ජනාධිපති කොමිෂන් සභාව විසින් වගකිවයුතු පුද්ගලයන් ලෙස නම් කළ පිරිස අතර හිටපු ජනාධිපති මෛත්රීපාල සිරිසේන, හිටපු අග්රාමාත්ය රනිල් වික්රමසිංහ, හිටපු ආරක්ෂක ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර යන මහත්වරුන් ඇතුළත් වේ. මීට අමතරව සිසිර මෙන්ඩිස්, නිලන්ත ජයවර්ධන, නන්දන මුණසිංහ, ලලිත් පතිනායක, දේශබන්දු තෙන්නකෝන් ඇතුළු හිටපු ජ්යෙෂ්ඨ පොලිස් නිලධාරීන් රැසකට එරෙහිව ද මෙලෙස විමර්ශන සිදු කිරීමට නියමිතය.
අතිරේක සොලිසිටර් ජනරාල් දිලීප පීරිස් සහ නියෝජ්ය සොලිසිටර් ජනරාල් මාධව තෙන්නකෝන් යන මහත්වරුන්ගේ අත්සනින් යුතුව අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර මහතා වෙත මෙම නියෝගය නිකුත් කර ඇත. අදාළ විමර්ශන පවත්වා ඒ පිළිබඳ වාර්තාවක් ඉදිරි නීතිමය උපදෙස් ලබා ගැනීම සඳහා කඩිනමින් තමන් වෙත ඉදිරිපත් කරන ලෙස ද නීතිපතිවරයා එම ලිපිය මගින් දන්වා තිබේ.
