කොළඹට ආසන්න ප්රදේශයක පිහිටි නිවාස සංකීර්ණයකට අයත් නිවාස කිහිපයක් නීතිවිරෝධී ලෙස පුද්ගලයන් කිහිපදෙනෙකු වෙත ලබාදීමට අනුමත කරමින් ලිපි නිකුත් කිරීමේ චෝදනාවකට අදාළව, ප්රකාශ ලබාදීම සඳහා හිටපු ජනාධිපති ගෝඨාභය රාජපක්ෂ මහතාට අල්ලස් හෝ දූෂණ චෝදනා විමර්ශන කොමිෂන් සභාව හමුවේ පෙනී සිටින ලෙස දන්වා ඇත. ඒ අනුව හිටපු ජනාධිපතිවරයා මෙම මස 13 වැනිදා කොමිසම වෙත කැඳවා තිබේ.
ගෝඨාභය රාජපක්ෂ මහතා ආරක්ෂක ලේකම් ධුරය දැරූ සමයේ මෙම සිදුවීම සිදුව ඇති බවට විමර්ශන අංශ අනාවරණය කරගෙන ඇත. මීට අමතරව, හිටපු අගවිනිසුරු මෙන්ම හිටපු නීතිපතිවරයකු ද වන මොහාන් පීරිස් මහතාට ද මෙම පරීක්ෂණයට අදාළව කරුණු විමසීම සඳහා එළඹෙන 16 වැනිදා කොමිසම හමුවට පැමිණෙන ලෙස දැනුම් දී තිබේ.
අදාළ නීතිවිරෝධී ලිපි නිකුත් කිරීමේ සිද්ධිය සම්බන්ධයෙන් වන ලිඛිත නිවේදනය පසුගිය සිකුරාදා (6) හිටපු ජනාධිපතිවරයා වෙත යොමු කර ඇති අතර, ඉදිරි දිනවලදී මේ සම්බන්ධයෙන් වන විමර්ශන කටයුතු තවදුරටත් පුළුල් කිරීමට නියමිතය.
