පාසල්වල අධ්‍යයන කටයුතු හෙට (8 දා) සිට සාමාන්‍ය පරිදි ආරම්භ කරන නිසා පාසල් දරුවන්ට මුඛ ආවරණ පැළඳීම ඇතුළු ලබාදී තිබෙන සෞඛ්‍ය උපදෙස් පිළිපැදීම අනිවාර්ය කරන ලෙස රජයේ වෛද්‍ය නිලධාරීන්ගේ සංගමයේ සංස්කාරක හරිත අලූත්ගේ මහතා ඊයේ (6 දා) ඉල්ලීමක් කළේය.
ගෝලීය වසංගතයක් ලෙස කොවිඞ් වසංගතය තවමත් රටවල් ගණනාවක පවතින නිසා අපේ රටෙන් එම රෝගය තුරන්වී ඇතැයි සිතා කටයුතු කළ නොහැකි බවත්, පාසල්වල සාමාන්‍ය ලෙස අධ්‍යාපන කටයුතු ආරම්භ කිරීම නිසා දරුවන් අතර මීටරයේ දුර ඉවත්වීමෙන් මුඛ ආවරණ පැළඳීම අනිවාර්ය කළ යුතු බව ඒ මහතා කීය.
අසල්වැසි ඉන්දියාව තුළ පෙරේදා (5 දා) පැය 24 ක් තුළ කොවිඞ් රෝගීන් 90,000 ක් වාර්තාවී තිබෙන බවත්, ශී‍්‍ර ලංකාවට ඉන්දියාවෙන් ධීවරයන් ලෙස විවිධ පුද්ගලයන් ඇතුළුවීමේ අවදානම් තත්ත්වයක් පවතින බවත් ඒ මහතා කීය.
ප‍්‍රංශය කොවිඞ් වසංගතය සාමාන්‍ය තත්ත්වයට පත්ව ඇතැයි සිතා රට විවෘත කිරීමෙන් පසු එම රටේ නැවත කොවිඞ් තත්ත්වයක් වාර්තාවීමත් සිංගප්පූරුවට විදෙස් රටවලින් පැමිණෙන පිරිස නිසි ලෙස කළමනාකරණය කර නොගැනීම නිසා කොවිඞ් වසංගතය පැතිරීමත් නිසා සිංගප්පූරු අගමැතිවරයාට ජනතාවගෙන් සමාව ඉල්ලීමට පවා සිදුවී තිබෙන බවද ඒ මහතා කියා සිටියේය.
සමාජයේ ඇතැම් පුද්ගලයන් කොවිඞ් වසංගතය රටෙන් තුරන් වී ඇති ආකාරයට හැසිරෙන බවත් එසේ කිරීම කිසිසේත් සුදුසු නොවන බවත් කී අලූත්ගේ මහතා දේශපාලකයන්, සෞඛ්‍ය අංශ සහ මහජනතාවගේ කැපවීම තවදුරටත් කොවිඞ් වසංගතයෙන් මිදීමට අවශ්‍ය බවත් කීය.
lanka lead news
