කොරෝනා ආසාදනය වීමෙන් මියයන මුස්ලිම් ජාතිකයන්ගේ මළසිරුර සම්බන්ධයෙන් අවසන් කටයුතු ඉස්ලාම් ආගම අනුකූලව සිදු කිරීමට ඉඩ ලබා දෙන ලෙස ශ්රී ලංකා මුස්ලිම් කොංග්රසයේ නායක හිටපු ඇමැති රවුෆ් හකීම් මහතා ඊයේ පැවති සර්වපාක්ෂික සමුළුවේ දී යෝජනා කර ඇත.
නමුත් ඊට සහභාගිවූ සෞඛ්ය සේවා අධ්යක්ෂ ජනරාල් අනිල් ජාසිංහ මහතාගේ නිර්දේශ හා අදහස් දැක්වීම මත එම යෝජනාව එකහෙළාම ප්රතික්ෂේප කිරීමට අග්රාමාත්ය මහින්ද රාජපක්ෂ මහතා ඇතුළු පක්ෂ නියෝජිතයන් තීරණය කර තිබේ.
කොරෝනා ආසාදනය වී මියයන මුස්ලිම් ජාතිකයන්ට සිය ආගමානුකූලව අවසන් කටයුතු සිදු කිරීමට ඉඩක් තිබිය යුතු බවත් එම දේහයන් භූමදාන කිරීමට ලෝක සෞඛ්ය සංවිධානය මගින් ප්රතික්ෂේප කරන්න ඇති බවත් රවුෆ් හකීම් මහතා එහිදී පවසා ඇත.
එමෙන්ම කොරෝනා වැළඳී මිය යන අයගේ මළසිරුර මගින් වෛරසය පිටවන බව මිථ්යාවක් බවත් එවන් කතාවක් ලෝක සෞඛ්ය සංවිධානය පවා සඳහන් කර නැති බවද හිටපු ඇමැතිවරයා සඳහන් කර තිබේ.
ඊට පැහැදිලි කිරීමක් සිදුකර ඇති සෞඛ්ය සේවා අධ්යක්ෂ ජනරාල් අනිල් ජාසිංහ මහතා පෙන්වා දී ඇත්තේ ශ්රී ලංකාව තුළ භූමියේ වතුර මට්ටම ඉහළ තලයක ඇති නිසා කොරෝනා ආසාදිතයෙකුගේ මළ සිරුරක් භූමිදානය කළ හොත් ඒ හරහා රෝගය කිරීමේ බරපතළ අවදානමක් මතුවිය හැකි නිසා එම අවදානමක් මේ අවස්ථාවේ රජය නොගතයුතු බවයි.
එමෙන්ම භූමදාන කටයුත්තක් සඳහා වැඩි වේලාවක් ගතවන බැවින් සීමිත කාර්යමණ්ඩල එවන් වෙලාවක් වැය කිරීම මේ මොහොතේ අනවශ්ය බවද ඔහු පෙන්වා දී ඇත.
මෙම සියලු කාරණා සලකමින් අවසානයේ අගමැති මහින්ද රාජපක්ෂ මහතා සඳහන් කර ඇත්තේ මේ සම්බන්ධයෙන් තීරණය ගත යුත්තේ දේශපාලනඥයන්ව නොව සෞඛ්ය බලධාරීන් බවයි. ඒ නිසා සෞඛ්ය බලධාරීන් යෝජනා කරන පරිදි දේහයන් ගැන අවසන් කටයුතු සිදුවිය යුතු බවද ඔහු පෙන්වා දී ඇත.
මේ පිළිබඳව තවදුරටත් අවධානය යොමුකිරීමට විශේෂඥ කමිටුවක් පත් කිරීමට හකීම් මහතා විසින් කරන ලද යෝජනාව කිසිවෙකුගේ අවධානය හෝ යොමු කර නැත.
(under the courtesy of lankacnews.com news web)
