පාසල් කාලය පස්වරු 2:00 දක්වා පවත්වාගෙන යාමට අධ්යාපන අමාත්යාංශය ගෙන තිබූ තීරණය මේ වන විට වෙනස් කර ඇති බවත්, එය ඉතා යහපත් තත්ත්වයක් බවත් ලංකා ගුරු සේවා සංගමයේ ලේකම් ජෝසප් ස්ටාලින් මහතා ප්රකාශ කළේය. හැටන් නගරයේ පැවති මාධ්ය හමුවකදී අදහස් දක්වමින් ඔහු කියා සිටියේ පාසල් කාලය දීර්ඝ කිරීම කිසිදු විද්යාත්මක පදනමකින් තොරව ගත් තීරණයක් බව තම සංගමය දිගින් දිගටම පෙන්වා දුන් බවයි. රජය එම තීරණය ඉල්ලා අස්කර ගැනීමෙන් පසුව හෝ අධ්යාපන ක්ෂේත්රයේ පවතින සැබෑ ගැටලුවලට විසඳුම් සෙවීමට අවධානය යොමු කළ යුතු බව ඔහු අවධාරණය කළේය.
වර්තමාන අධ්යාපන ප්රතිසංස්කරණ ක්රියාවලිය පිළිබඳව ද දැඩි විවේචනයක් එල්ල කළ ස්ටාලින් මහතා, නිසි නියාමන ව්යාපෘතියකින් තොරව හදිසියේ මෙම ප්රතිසංස්කරණ ක්රියාත්මක කිරීම ගැටලුකාරී බව පෙන්වා දුන්නේය. මෙවර 1 වසරේ සහ 6 වසරේ සිසුන් මෙම ප්රතිසංස්කරණවල පර්යේෂණාත්මක කණ්ඩායම් බවට පත්ව ඇති බවත්, ලෝකයේ වෙනත් රටවල මෙවැනි වෙනස්කම් සිදු කරන්නේ ක්රමවත් අධ්යයනයකින් පසුව බවත් ඔහු පැවසීය. විශේෂයෙන්ම 6 වසරේ ඉංග්රීසි මොඩියුලයට අදාළව මතුව ඇති ගැටලුව සමස්ත ප්රතිසංස්කරණ ක්රියාවලියේම පවතින දුර්වලතාවක් බව ඔහු පෙන්වා දුන්නේය.
අධ්යාපන ක්ෂේත්රයේ පවතින තරගකාරී විභාග රටාව, විශ්වවිද්යාල ප්රවේශය, ඉංග්රීසි මාධ්ය අධ්යාපනය ලබා ගැනීමේ ගැටලු සහ පන්ති කාමරවල සිසුන් සංඛ්යාව අධික වීම වැනි සැබෑ අර්බුදවලට මෙම නව ප්රතිසංස්කරණ හරහා විසඳුම් නොලැබෙන බව ද හෙතෙම සඳහන් කළේය. ජාතික අධ්යාපන ආයතනයේ අධ්යක්ෂ ජනරාල්වරියගේ ඉල්ලා අස්වීම පිළිබඳව ද අදහස් දක්වමින් ඔහු කියා සිටියේ, ක්ෂේත්රය පිළිබඳ මනා අවබෝධයක් සහ සුදුසුකම් සහිත නිලධාරීන් පත් කරමින් ජාතික අධ්යාපන ආයතනය සහ අධ්යාපන කොමිසම වහාම ප්රතිසංවිධානය කළ යුතු බවයි.
